As xornadas 9 e 10 da Liga Galega de Hóckey Liña na súa categoría Masculina disputáronse este domingo, 26 de marzo, no pavillón Daniel Cordido Castro de Lugo. Mentres Lóstregos liquidaba os seus dous partidos sen dificultades, sumando a novena e a décima vitoria nos dez partidos xogados ata o momento, por detrás a sorpresa era a derrota de CHL Cabuxos ante Lóstregos Master, o que deixa a CPL Brigantium Arteixo cunha renda de tres puntos sobre Cabuxos, que a falta de catro xornadas pode ser moi importante, máis aínda tendo en conta que ambos deben enfrontarse ao líder. Os que non fallan son os da Guarda HL, sufrindo o seu contra Lóstregos Master nun partido moi importante para os dous no que se terminaban impoñendo os do sur de Pontevedra, pois agora contan con seis puntos de renda na loita pola cuarta praza que dá acceso ao playoff polo título, que previsiblemente se xogarán entre ambos, a pesar de que os de Lugo contan coa diferenza de goles a favor ao vencer no encontro da primeira volta por 2-5 e ceder neste por 3-4. A Sexta Sede, penúltima da tempada, será o domingo 23 de abril, de novo en Lugo.
