Mudaron todos os pronósticos previos tras os resultados e a clasificación producidos na fase regular da Liga Autonómica da categoría Senior Feminina de Hóckey sobre Patíns, que este domingo 26 de maio celebraba a Final a 4 entre os catro primeiros equipos clasificados na mesma.
Xa pola mañá, nas dúas semifinais, saltaba a sorpresa en ambas cos equipos clasificados na liga regular na terceira e cuarta prazas accedendo á final e deixando fóra da mesma aos teoricamente favoritos. Así, na primeira delas o Diver Patín C. D. derrotaba ao campión da fase regular, o H. C. Borbolla, por 1-4 mentres na segunda tamén era o C. H. Compostela o que acadaba o paso á final despois de vencer por 2-4 ao H. C. Liceo.
Un duro desenlace tanto para H. C. Borbolla como para o H. C. Liceo, que se vían así desprazados a xogar a final de consolación na que o terceiro posto sería para o Borbolla, tras derrotar ao H. C. Liceo por 3-0. Quedaba por disputar a final, nunha intensa xornada de Hóckey sobre Patíns no polideportivo de Monte Alto da Coruña, e onde os dous equipos composteláns tiñan que resolver o título galego da categoría. Foi un partido vibrante, con incertidume e alternancias no marcador, aínda que finalmente o título era para un Diver Patín C. D. que soubo resolver mellor as oportunidades que se lle presentaron cun tanto a tres minutos e medio para o final, nunha bola que quedaba morta diante da portaría do Compostela e que Sabrina Estebes pudo introducir na rede, deixando deste xeito o 3-2 definitivo.
Resultados e vídeos dos partidos
Galería de imaxes
H. C. Borbolla – H. C. Liceo (terceiro e cuarto posto)
Diver Patín C. D. – C. H. Compostela (final)
#eupatino
