Posta de longo para a nova pista de Ourense, no pavillón do colexio público Luis Acuña do barrio da Carballeira, onde este domingo 20 de maio se disputaron as Finais a 4 das categorías Feminina e Benxamín de Hóckey Liña. Non houbo sorpresa na dos máis cativos, con Peque Lóstregos impoñéndose aos locais de Morcegos HL por 8-3, quen foron capaces de pasar á final en detrimento de Club Hóckey Minimeigas, que rematara a liga regular en segunda posición. Un axustado 2-3, con un gol dos ourensáns nos derradeiros minutos do partido, permitía a estes xogar a final e proclamarse subcampións.
Na Feminina, os dous favoritos disputaron a final, con Lóstregos Feminino derrotando claramente a ACD Alquimia Inline (7-0) nunha semifinal e CHL Meigas facendo o propio na outra ante Brigantium, aínda que neste caso por un axustado 2-0. No que xa vai camiño de converterse nun enfrentamento clásico, Meigas era desta volta o gañador da categoría Feminina mudando así o desenlace da recente semifinal da Copa Princesa Feminina, ao derrotar a Lóstregos por 1-0, nun partido moi semellante a aquel desputado hai poucas datas en Lugo.
A entrega de trofeos aos campións e de medallas aos tres primeiros clasificados contou coa presenza de Mario Guede, concelleiro de deportes do Concello de Ourense.
[Fotos: CP Lóstregos Lucus e CHL Meigas]
#eupatino
