O pavillón polideportivo de Monte Alto da Coruña será o escenario da vindeira Sede da Liga Galega de Hockey Liña na categoría masculina, organizada polo ADC Alquimia InLine. A cita será o vindeiro domingo, 4 de decembro, a partir das 10:30 horas cando comezarán a disputarse os partidos correspondentes ás xornadas cinco e seis.
Como encontros de máxima rivalidade e interés cómpre destacar os enfrontamentos entre os primeiros clasificados da táboa, xa que Lóstregos HL e CHL Cabuxos de Lugo xogan contra Brigantium Arteixo e A Guarda Hóckey Liña en catro partidos que marcarán as diferenzas na clasificación antes do descanso de Nadal. Asimesmo, na parte baixa, os equipos loitarán por puntuar para non quedar descolgados nesta Terceira Sede da competición galega.