O vindeiro domingo, 26 de marzo, a Liga Galega de Hóckey Liña volta á cidade da muralla. O pavillón Daniel Cordido Castro do barrio lucense da Piringalla acollerá a Quinta Sede da competición rexional na categoría Masculina, correspondente ás xornadas nove e dez.
Coa clasificación da Liga Galega comandada por un intratable Lóstregos HL, que segue sen ceder ningún punto e vencendo con solvencia os seus oito encontros disputados e que ademais exercerá de anfitrión, a emoción está na parte media da táboa, con catro equipos loitando por tres prazas para os playoffs polo título, que son CHL Cabuxos, CPL Brigantium e A Guarda Hóckey Liña, aínda que a diferenza dos do sur de Pontevedra cos que lle seguen, Lóstregos Master e Vigo Blue Ringed sexa de só tres puntos, polo que se manterá a emoción ata o remate da liga regular.