Intenso fin de semana para a Patinaxe Artística coa celebración da I Fase de Niveis, do 1 ao 3, mentres que os do 4 ao 8 farano na derradeira de marzo, concretamente os días 30 e 31, debido ao elevado número de inscricións rexistradas pois nesta quenda son 649 os patinadores e patinadoras inscritos.
Os clubes da Coruña Norte participarán durante o sábado 2 de marzo e o domingo 3 no pavillón municipal de Cabana de Bergantiños coa organización do Club Patinaxe Nordés e a presenza de 224 deportistas. No que atinxe á Coruña Sur, haberá 219 participantes no polideportivo municipal da Pobra do Caramiñal organizado polo Club Patinaxe A Pobra. Xa para os clubes das provincias de Pontevedra e Ourense, será o pavillón do C. E. I. P. Souto-Donas de Gondomar o que acolla a competición con 206 inscritos e tendo como organizador ao C. P. A. Gondomar.
As ordes de saída así como os horarios xa están dispoñibles na páxina de competicións da Federación Galega de Patinaxe.
#eupatino
