Con case todas as ligas autonómicas de Hóckey sobre Patíns xa en marcha, este fin de semana comeza unha das máis demandadas nas últimas tempadas e que por fin é xa unha realidade. A Liga Autonómica de Veteranos estará formada por catro equipos (HC Liceo de A Coruña, CH Oleiros, Escola Lubiáns de Carballo e Club Compañía de María de Ferrol), que disputarán unha liga regular na que haberá tres enfrontamentos directos entre todos os equipos. Unha vella aspiración que por fin se puido levar a cabo e á que agardemos que no futuro se poidan engadir máis conxuntos, aínda que como é habitual neste tipo de competicións, o obxectivo é pasalo ben e evocar recordos pasados de quen xa deron todo o que tiñan ofrecer, tanto xogadores/as como adestradores/as.
Por outra banda, o pasado fin de semana finalizaba a fase de grupos da categoría Infantil, cos tres primeiros de cada un dos tres clasificándose para a 1ª División mentres o resto seguirán competindo na 2ª División. No Grupo 1 o campión foi o Club Compañía de María “A”, que finalizaba invicto, mentres que no Grupo 2 a mellor diferenza de goles de Escola Lubiáns outorgáballe a primeira posición empatado a puntos con HC Liceo “A” e HC Raxoi “A”. O outro equipo que gañou todos os seus partidos foi o CH Compostela “A” no Grupo 3, que accede á 1ª División xunto a Club AA Dominicos e Club Compañía de María “B” e aos que se engadirán tamén AC Órdenes e Santa María del Mar procedentes do Grupo 1.
Calendario, resultados e clasificación
#eupatino