No pavillón de Bouzas en Vigo disputouse, este pasado domingo 30 de abril, a Cuarta Sede da Liga Galega en categorías Feminina e Infantil de Hóckey Liña. Entre as féminas o partido máis interesante das dúas xornadas celebradas, a sétima e a oitava, foi o que xogaron os dous equipos que contaban os seus encontros por vitorias, decantándose esta vez a prol do CHL Meigas ao derrotar a Lóstregos Feminino, polo que a falla da sede aprazada no seu momento queda como líder provisional en solitario. Por outra banda, ADC Alquimia InLine mantén a terceira posición logo de vencer a CPL Brigantium Arteixo que se descolga un pouco máis, polo que aínda non ten garantido poder disputar as eliminatorias polo título, xa que A Guarda Hóckey Liña conta con opcións a pesar do seu complicado calendario nos dous partidos que lle restan. A derradeira sede será o 21 de maio no pavillón Daniel Cordido Castro de Lugo correspondente ás xornadas tres e catro suspendidas o 21 de marzo.
No que atinxe á categoría Infantil, que xogará de novo o vindeiro domingo no que será a súa Quinta Sede pero coa Segunda aprazada ao 21 de maio, a gran sorpresa foi a derrota do líder ata o momento, o conxunto lugués do Olimpio XXI Lóstregos, que perdía ante A Guarda HL, aínda que non perde a primeira posición provisional por mellor diferenza de goles a favor e en contra con Meiguiñas, que tamén perdía ante Lóstregos Norte. Ambos colleitaban a súa primeira derrota da tempada, perdendo así unha boa oportunidade de quedar en solitario na cabeza da clasificación. Ambos os dous poderían desfacer este empate a puntos este domingo, no partido que os enfrontará de novo no pavillón de Bouzas en Vigo ás 10:00 horas.
